Аъзамова Дилфуза Салаитдиновна

Театр: Қашқадарё вилояти қўғирчоқ театри

Аъзамова Дилфуза Салаитдиновна ушбу театрда 2008 йилдан буён фаолият кўрсатиб келмоқда. Д.Аьзамова – ўз касби сирларини чуқур ўзлаштирган, дунёқараши кенг, болалар руҳиятини чуқур англаган, иқтидорли актёр. У ўзининг беназир маҳорати билан қўғирчоқ театри ривожига муносиб ҳисса қўшиб келмоқда. Қашқадарё вилояти қўғирчоқ театрида саҳналаштирилган бир қанча спектаклларда ранг-баранг ролларни ижро этди. Бу роллари орқали мазкур театрнинг ёш томошабинлари онгу шуурига яхшилик, ватанпарварлик, юртга садоқат, ҳалоллик, дўстлик, тўғрилик, ростгўйлик, меҳнатсеварлик, фидойилик, жасорат, саховатпешалик, меҳрибонлик, табиатга ва мутолаага муҳаббат сингари эзгу фазилатларни таъсирчан тарзда сингдиришга муваффақ бўлди. Ижодкорлик фаолияти давомида режиссёр билан ҳамкорликда сценарий асосида спектаклнинг бадиий ечимини топиш, қўғирчоқлар образини яратиш, декорацияларнинг ранг-баранглиги устида ишлаб, эртак-томошаларнинг қизиқарли чиқишида жонбозлик кўрсатмоқда. Д.Аьзамова театрдаги ижодий фаолияти давомида бир қанча спектаклларда бетакрор образлар яратиб келмоқда: “Меҳр ила сеҳрланган жой” спектаклида Турчахон ва Махси момо, “Муқбил ва Мудбир” спектаклида Малика, “Ўлмасин жайрон”да спектаклида Она жайрон, “Шайтонга йўлиққан бола”да спектаклида Билағон, “ Мушукча Миу ” спектаклида мушукча, “Қўёш саховатида” спектаклида Хола, “Фантнинг саргузашти” спектаклида Буви, “Она меҳри” спектаклида товуқ хола, “Ношукур қуён” спектаклида Она қуён, “Тўрт эгизак” спектаклида Эгизаклар, “Тандир она саховати” спектаклида Чумоли, “Шум бола” спектаклида Шум бола онаси, “Қуш тили ” спектаклида Худхуд ролларини маҳорат билан ижро этди. Д.Аьзамова 2013 йилда Самарқанд шаҳрида ўтказилган Ўзбекистон қўғирчоқ театрларининг IX Республика кўрик-фестивалида, “Тандир она саҳовати” спектакли Чигиртка ролида иштирок этган. 2016 йилда Андижон шаҳрида ўтказилган “Ўзбекистон қўғирчоқ театрларининг XI Республика кўрик-фестивали”да “Муқбил ва Мудбир” спектакли Малика ролида қатнашган фахрли иккинчи ўринга сазовор бўлган. У вилоят миқёсида ҳар йили ўтказиладиган Наврўз, Мустақиллик, Халқаро болаларни ҳимоя қилиш куни байрамлари тантаналари ва кўплаб оммавий байрам тадбирларида фаол иштирок этади.