“Ношукур Қуён”

Асарнинг асосий мавзуси борига қаноат қилмаган Қуёнчанинг ношукурликлари ва унинг ёмон оқибатлари ҳақидадир. У ҳаммадан тез югуришига қаноат қилмасдан қуёнлар учун иложсиз орзу – осмонда парвоз қилиш ҳақида ўйлаб қолади. Бу орзусини амалга ошириш учун ёлғончи Қарғанинг пуч ваъдаларига учади. Оқибатда эса орзуси сароб эканлигини англаб, ўткинчи ҳою-ҳавасларга қўл силтаб, бебошлигидан афсус чекиб, ота-онаси бағрига қайтади. Спектакл орқали ёш томошабинларга қаноат ва шукрона сингари эзгу қадриятларнинг аҳамияти уқтирилади.

–Томошамиз айни кузги таътил кунларида ҳордиқ чиқараётган болажонларга катта туҳфа бўлади, деб ишонамиз, – дейди вилоят қўғирчоқ театри актёри Турдимурод Худойбердиев. – Муҳими, ниҳояда Қуёнча ўз хатосини тушуниб етади ва уни тузатишга шошилади. Бу орқали манманлик, ёлғончилик, қаноатсизликнинг оқибати ёмон бўлишини очиб беришга ҳаракат қилдик.

Таъкидлаш жоизки, “Ношукур Қуён” жорий йилда театр жамоаси томонидан саҳналаштирилган учинчи спектакл ҳисобланади. Бундан аввал ижодий жамоа “Мушукча Миёв” (янгиланган вариант) ҳамда “Муқбил ва Мудбир” спектакллари билан болажонларимизни мамнун этган эди.